21.01.2022

 

 

На запрашэньне прыняць удзел ва экуменічнай сустрэчы ў грэка-каталіцкай царкве падчас Тыдня малітваў за еднасьць хрысьціянаў адгукнуліся сем пастараў розных евангельскіх супольнасьцяў з Берасьця і Кобрыня разам з вернікамі.

 

На пачатку сустрэчы прысутныя разам памаліліся, прачытаўшы шэраг псальмаў з Псалтыра ў беларускім перакладзе а. Аляксандра Надсана. Затым сваім словам перад прысутнымі падзяліўся парах грэка-каталіцкай парафіі ў Берасьці а. Ігар Кандрацьеў, які падкрэсьліў важнае значэньне Бібліі і яе перакладаў на сучасныя мовы ў жыцьці вернікаў. Ён адзначыў вялікі ўклад у паглыбленьне малітоўнага жыцьця нашых продкаў Францішка Скарыны, расказаў пра асьветніцкае значэньне выдавецкай і перакладчыцкай дзейнасьці беларускага першадрукара, які праз свае выданьні імкнуўся зрабіць даступным Слова Божае для кожнага. Ягоны прыклад і сёньня натхняе беларускіх перакладчыкаў на новыя пераклады Бібліі на сучасную беларускую мову. Пры гэтым, кожны перакладчык заўсёды прапускае Слова Божае з Бібліі праз сябе і тым самым уступае ў дыялог з Богам. Без сумневу, меў такі дыялог з Богам і Францішак Скарына, калі рыхтаваў да друку свае пераклады кніг Бібліі.

 

Перад прысутнымі выступілі таксама пратэстанцкія пастары. Пастар з царквы “Збаўленьне” Аляксандар Барысюк расказаў пра асьветніцкія праекты “Біблія на Берасьцейшчыне” і “Беларускія пераклады Бібліі”, якія ладзіліся ў Берасьцейскай абласной бібліятэцы і ў Нацыянальнай бібліятэцы ў Менску з удзелам прадстаўнікоў розных канфесіяў. Яны могуць служыць прыкладам экуменічнага супрацоўніцтва, бо Біблія — гэта тое, што яднае ўсіх хрысьціянаў. Аснову “Малой падарожнай кніжкі” Скарыны складае Псалтыр і розныя малітвы. І сёньня Біблія павінна быць нашай “Малой падарожнай кніжкай”.

 

Пастар Юры Аліеў расказаў, як да яго ў савецкія часы патрапіла першая Біблія ў Нарвегіі, калі ён служыў мараком, і як яна ўвайшла ў яго жыцьцё.

 

Прысутных на экуменічнай сустрэчы прывітаў таксама пастар з Кобрыня Сяргей Самулевіч. Айцец Ігар Кандрацьеў прачытаў адну з малітваў з “Малой падарожнай кніжкі”, напісаную самім Францішкам Скарынам — да Хрыста ўкрыжаванага. Затым, узяўшыся за рукі, усе прысутныя на экуменічнай сустрэчы разам прачыталі малітву “Ойча наш”.

 

Спатканьне яшчэ доўга працягвалася далей у прыязнай атмасферы за гарбатай, дзе прысутныя дзяліліся досьведам свайго рэлігійнага жыцьця, разважалі над асобнымі ўрыўкамі і складанымі месцамі ў Бібліі, адказвалі на розныя пытаньні, у тым ліку пра жыцьцё і дзейнасьць Францішка Скарыны.

 

Сёлета, у дзень 20 студзеня, з нагоды 500-годдзя выданьня Ф. Скарынам “Малой падарожнай кніжкі”, каб ушанаваць гэтую важную гістарычную падзею ў духоўна-рэлігійным жыцьці, у Менску, Полацку, Вільні, Варшаве, Падуі і Празе адбыліся ўрачыстыя набажэнствы, якія ўзначальвалі высокія царкоўныя ярархі. Экуменічная малітоўная сустрэча ў грэка-каталіцкай царкве сьв. братоў-апосталаў Пятра і Андрэя ў Берасьці, што праходзіла ў рамках Тыдня малітваў за еднасьць хрысьціянаў, які штогод адзначаецца ў Каталіцкай Царкве 18-25 студзеня, таксама стала своеасаблівай падзякай хрысьціянаў з розных канфесіяў Францішку Скарыну за яго асьветніцкую працу ў пашырэньні Слова Божага.