03.12.2021

 

 

2-4 сьнежня 2021 году Сьвяты Айцец Францішак наведае Кіпр, а 4-6 сьнежня — Грэцыю. Ён паедзе ў Нікасію, Афіны і на востраў Лесбас — паведамляе Vatican News.

 

Ватыканскі ярарх падкрэсьліў, што візіт Папы Рымскага ахоплівае дзьве краіны, у якіх большасьць жыхароў — праваслаўныя. Ён лічыць гэта станоўчай прыкметай паглыбленьня і ўмацаваньня каталіцка-праваслаўных адносінаў. У іх ён вылучыў «дыялог любові» і «дыялог праўды». Першы азначае паглыбленьне сяброўскіх адносінаў паміж Цэрквамі, другі — тэалагічную працу па пераадоленьні перашкодаў, атрыманых у спадчыну ад мінулага.

 

«Праваслаўныя Цэрквы вырашылі пачаць гэты тэалагічны дыялог не на двухбаковым узроўні, з асобнымі Цэрквамі, а на шматбаковым узроўні. Такім чынам, у нас зьявілася Міжнародная зьмешаная камісія, да якой належаць 14 розных аўтакефальных Праваслаўных Цэркваў, і мы з імі вядзём дыялог», — растлумачыў старшыня Папскай Рады па спрыяньні еднасьці хрысьціянаў.

 

Кардынал Кох дадаў, што падарожжа Сьвятога Айца стане важным крокам у паглыбленьні «дыялогу любові». Ён прызнаў, што каталіцка-праваслаўныя адносіны на Кіпры добрыя, а ў кіраўніка Царквы Кіпра, архібіскупа Хрызастома ІІ «адкрытае для экуменізму сэрца».

 

Ватыканскі кардынал адзначыў, што падчас сваёй паездкі Францішак хоча засяродзіцца на становішчы мігрантаў і ўцекачоў. На Кіпры пройдзе экуменічная малітва з удзелам мігрантаў, а ў Грэцыі Папа зноў наведае востраў Лесбас, дзе ўжо быў у 2016 годзе, «каб даць выразны сігнал, што дапамога мігрантам і бежанцам — гэта вялікі экуменічны выклік, які патрабуе супрацоўніцтва».