24.12.2020

 

 

Як паведамляе Радыё Рацыя, суддзя суду Першамайскага раёну Віцебска Міхаіл Юрчанка вынес папярэджаньні ўсім тром падсудным, якіх вінавацілі паводле артыкула 23.34 КоАП — нібыта за правядзеньне несанкцыянаванага пікета.

 

Суд над віцебскімі сьвятарамі, якіх затрымалі 8 сьнежня 2020 году, распачаўся яшчэ 10 сьнежня. Да гэтага каталіцкія сьвятары, будучы затрыманымі, ноч правялі ў ізалятары часовага ўтрыманьня. Але два тыдні таму іх не асудзілі, а справы адправілі на дапрацоўку. Суддзя тады палічыў, што ў матэрыялах справы недастаткова інфармацыі, каб прыняць рашэньне.

 

Падтрымаць айца Аляксея Варанко, айца Віктара Жука і Аляксея Каракова прыйшлі некалькі дзясяткаў чалавек, у тым ліку рыма-каталіцкі біскуп Віцебскі Алег Буткевіч, парах грэка-каталіцкай парафіі Ўваскрасеньня Хрыстова ў Віцебску а. Зьміцер Грышан, ксёндз Вячаслаў Барок з Расонаў і яшчэ некалькі духоўных асобаў. Аднак у судовую залю пусьцілі толькі 8 чалавек, бо суддзя спаслаўся на небясьпеку распаўсюду каранавірусу. Шмат людзей у розных кутках Беларусі і нават за яе межамі перажывалі і маліліся за затрыманых каталіцкіх сьвятароў. Да гэтага на пачатку сьнежня па 10 сутак арышту адседзелі грэка-каталіцкі сьвятар з Івацэвічаў а. Віталь Быстроў і рыма-каталіцкі ксёндз Вячаслаў Барок з Расонаў, у дзеяньнях якіх праваахоўнікі ўгледзелі парушэньне заканадаўства.

 

Міліцыянт Станіслаў Шэпелеў, які выступаў у судзе ў якасьці сьведкі, у дзень, калі затрымалі сьвятароў і верніка, нават ня быў заняты па службе. Калі ўбачыў у іх бел-чырвона-белы сьцяг, хоць яны і не выкрыквалі, паводле яго словаў, ніякіх лозунгаў, тут жа паведаміў свайму кіраўніцтву, што ён стаў сьведкам адміністрацыйнага правапарушэньня. Паводле паказаньняў супрацоўніка міліцыі выходзіла, што ўдзельнікаў было ня трое, а чацьвёра, а сьцягоў было два. Гэтыя паказаньні адрозьніваліся ад сьведчаньняў саміх затрыманых.

 

Ніхто з падсудных не пагадзіўся з складзеным на іх пратаколам і не прызнаў віну, бо паводле іх словаў, яны ня ўдзельнічалі ў несанкцыянаваным пікеце, а проста маліліся ў той час, калі іх заўважыў міліцыянт. Пробашч рыма-каталіцкай парафіі сьв. Уладзіслава а. Віктар Жук, сьвятар грэка-каталіцкай царквы Ўваскрасеньня Хрыстова а. Аляксей Варанко, а таксама Аляксей Каракоў патлумачылі суду, што 8 верасьня яны гулялі па горадзе і ў пэўны момант на ўзвышшы каля гандлёвага цэнтру «Green» вырашылі памаліліцца за беларусаў. У аднаго з сьвятароў быў ружанец, у другога — бел-чырвона-белы сьцяг, які ён накінуў на плечы. Абодва сьвятары і вернік тлумачылі суду, што для іх гэты сьцяг мае сымболіку перамогі Ісуса Хрыста, яна вядомая ва ўсім сьвеце, што ў гэтым колеравым спалучэньні ня варта бачыць крамолу.

 

Суддзя аднак не пагадзіўся прыняць пункт гледжаньня адвакатак падсудных, якія прасілі скасаваць усе тры адміністрацыйныя справы праз адсутнасьць складу правапарушэньня ў іх, і прысудзіў хоць і мінімальнае, але ўсё ж такі пакараньне ў выглядзе папярэджаньня.