08.04.2016

 

 

Распавядаючы пра гэтую падзею для Беларускай рэдакцыі Ватыканскага радыё, Архімандрыт Сяргей Гаек ахарактарызаваў гэты пяцідзённы міжнародны форум у Рыме платформай малітвы, роздуму і дыскусіяў.

 

Ён заўважыў, што слова «апостальскі» ў назьве кангрэсу не выпадковае. «Гэты Еўрапейскі кангрэс Божай Міласэрнасьці названы апостальскім, таму што спасылаецца непасрэдна на апостальства і душпастырскае служэньне – менш багаслоўя, а больш досьведу і сьведчаньняў. Ён праходзіць у Год Божай Міласэрнасьці, таму мае вельмі асаблівае значэньне. У ім удзельнічае некалькі сотняў прадстаўнікоў. Гэта ёсьць аніматары, людзі заангажаваныя ў пашырэньне пабожнасьці, натхненьнем для якой зьяўляецца Божая міласэрнасьць; і ня толькі пабожнасьці, але і розных сацыяльных ініцыятываў, асабліва на ўскраінах сацыяльнага жыцьця», — сказаў Архімандрыт Сяргей.

 

Дэлегат ад Беларусі нагадаў, што пасьля еўрапейскага форуму пройдзе таксама Сусьветны апостальскі кангрэс Божай Міласэрнасьці. Гэты форум адбудзецца ў Філіпінах 16-20 студзеня 2017 году.

 

«Еўрапейскі кангрэс Божай Міласэрнасьці — гэта платформа для малітвы, роздуму і дыскусіяў, але, перш за ўсё, удзельнікі разьдзяляюць між сабой досьвед веры і сацыяльнай дзейнасьці. Канешне, вельмі важным тэкстам, на які шмат хто спасылаецца, зьяўляецца кніга Папы «Імя Бога — Міласэрнасьць». Усе чакаюць таксама постсінадальную Апостальскую адгартацыю на тэму сям’і, якую Папа ўжо падпісаў, але тэкст будзе апублікаваны праз тыдзень», — сказаў айцец Сяргей Гаек.

 

Як адзначыў Апостальскі Візітатар для грэка-католікаў Беларусі, прыемным жэстам стала адмысловае прывітаньне з боку арганізатараў гэтага міжнароднага форуму для ярархаў і вернікаў Царквы ў Беларусі.

 

У сёлетнім рымскім форуме Божай міласэрнасьці ўдзельнічаў і Папа Францішак. Ён прысутнічаў на малітоўным чуваньні з нагоды чарговай гадавіны сьмерці сьв. Яна Паўла ІІ, якое адбылося 2 красавіка. А на наступны дзень, 3 красавіка, у Нядзелю Божай Міласэрнасці, удзельнікі Еўрапейскага апостальскага кангрэсу Божай Міласэрнасці маліліся разам з Папам Францішкам на св. Імшы, якую ён адслужыў на плошчы сьв. Пятра.

У сваёй гаміліі падчас набажэнства Сьвяты Айцец падкрэсьліў, што ўчынкі міласэрнасьці павінны быць ладам жыцьця кожнага хрысьціяніна. Паводле словаў Францішка, «быць апосталам міласэрнасьці азначае дакрануцца да Хрыстовых ранаў», якія ёсьць у целе і ў душы шматлікіх нашых братоў і сясьцёр. Вылечваючы гэтыя раны мы прызнаем жывым і прысутным Ісуса Хрыста, дазваляем іншым, якія імкнуцца дакрануць рукой да Яго міласэрнасьці, прызнаць Ісуса сваім Госпадам і Богам.