22.09.2014

 

 

Нядаўна высьвячаныя біскупы сабраліся ў Рыме на сьпецыяльны курс, арганізаваны Кангрэгацыяй па справах біскупаў. Сярод каталіцкіх ярархаў, што прыехалі ў Вечны Горад, тры з Беларусі — біскупы Алег Буткевіч з Віцебску, Юзаф Станеўскі з Горадні і Юры Касабуцкі з Менску. На аўдыенцыі з біскупамі Папа Францішак засяродзіў свой выступ на тэме любові, якая заўсёды павінна зьвязваць пастыра з народам.

 

“Калі ласка, ня будзьце біскупамі з пэўным тэрмінам прыдатнасьці, якія маюць патрэбу ў сталай перамене месцаў. Такія падобныя да лекаў, што з часам губляюць гаючую ўласьцівасьць, альбо да тых прэсных рэчываў, якія выкідаюць праз іх непрыдатнасьць (пар. Мц 5,13). Важна не абмяжоўваць гаючую сілу, якая паходзіць з глыбіняў атрыманага вамі дару: гэта абароніць вас ад спакусы бязмэтавага блуканьня, таму што ніводны вецер ня будзе спадарожным для таго, хто ня ведае, куды ідзе”, — зьвярнуўся Папа да сабраных на аўдыенцыі ярархаў.

 

Сьвяты Айцец нагадаў, што біскуп — гэта перш за ўсё асоба, якая ведае, “дзе жыве Госпад” і паказвае шлях туды. Шмат людзей углядаецца ў прыклад свайго пастыра, перш за ўсё сьвятары, сярод якіх, на жаль, ёсьць такія, хто перастаў шукаць Хрыста, або стаў жыць “у іншых экзістэнцыйных шыротах”. “Іншыя забыліся пра бацькоўства біскупа або, можа, стаміўшыся шукаць яго, цяпер жывуць так, як быццам бы ня маюць Айца або падманваюць сябе, што ня маюць у ім патрэбы”, — сказаў Рымскі Архірэй. Ён параіў “маладым біскупам” культываваць у сабе айцоўскі і пастырскі падыход у адносінах да сваіх сьвятароў, якія патрабуюць, каб іх прымалі, слухалі і накіроўвалі.

Папа заклікаў ярархаў прымаць усіх людзей, не дыскрымінуючы нікога, прапануючы кожнаму “цьвёрдасьць улады, якая спрыяе росту, і слодыч бацькоўства, якое адраджае”. “Любіце людзей, якіх даў вам Бог, нават калі яны “учынілі вялікія грахі”, нястомна “ўздымайцеся да Госпада”, каб атрымаць прабачэньне і новы пачатак, нават калі ў выніку рассыплюцца многія вашыя ілжывыя ўяўленьні пра Боскае Аблічча ці фантазіі, якія вы падтрымлівалі што да спосабу лучнасьці з Богам (пар. Вых 32, 30-31)”, — сказаў Папа Францішак.

 

Сьвяты Айцец прызнаўся, што бачыць у новых біскупах асобаў, здольных абудзіць Царкву, яго веру, надзею і любоў, здольных клапаціцца пра Божы вінаграднік у надзеі на багаты ўраджай, здольных аднавіць еднасьць, “плесьці сеткі”, каб выправіць і пераадолець падзелы.

 

“Не марнуйце энэргіі на процідзеяньне і супрацьстаяньне, але выкарыстайце яе для стварэньня і любові”, — заклікаў Рымскі Архірэй біскупаў.